Sut rydym yn arolygu gwasanaethau gofal plant a chwarae

Pan fydd ein harolygwyr yn ymweld â gwasanaeth gofal, byddant yn ystyried pedair thema graidd:

• Lles
• Gofal a Datblygiad
• Amgylchedd
• Arweinyddiaeth a Rheolaeth

Mae gennym ddau fath o arolygiad: llawn ac â phwyslais penodol.

Arolygiadau llawn

Mae'r rhan fwyaf o'n harolygiadau yn arolygiadau llawn sydd wedi'u cynllunio fel rhan o'n rhaglen arolygu. Cynhelir arolygiadau llawn tua chwe mis ar ôl i wasanaeth sydd newydd ei gofrestru ddod yn weithredol. Yn dilyn hynny, rydym yn defnyddio model amserlennu seiliedig ar wybodaeth i benderfynu pryd y caiff yr arolygiad nesaf ei gynnal.

Rydym yn disgwyl i bob darparwr roi ei brosesau sicrhau ansawdd ei hun ar waith mewn ffordd effeithiol er mwyn gwella'r canlyniadau i blant sy'n defnyddio ei wasanaeth. Yn 2024, gwnaethom gyflwyno cyfarfodydd ansawdd er mwyn helpu darparwyr i wneud gwelliannau. Gweler y wybodaeth am gyfarfodydd ansawdd isod.

Drwy ddefnyddio ein model amserlennu seiliedig ar wybodaeth, rydym yn rhoi blaenoriaeth i'r gwasanaethau y mae angen iddynt wneud y gwelliannau mwyaf ac yn trefnu arolygiad ar eu cyfer o fewn chwe mis. Ni fydd y gwasanaethau hyn yn gymwys i gael cyfarfod ansawdd hyd nes y byddwn yn hyderus eu bod wedi gwneud y gwelliannau gofynnol.

Yn ystod 2024, gwnaethom adolygu ein data ar arolygiadau ac, yn seiliedig ar ein canfyddiadau, newidiwyd y cyfnod hwyaf o amser rhwng arolygiadau i bum mlynedd. Ar gyfer y gwasanaethau y mae angen iddynt wneud y gwelliannau mwyaf, byddwn yn cynnal arolygiad yn gynharach, a'r cyfnod hwyaf o amser rhwng yr arolygiadau hyn fydd dwy flynedd. Byddwn yn cynnal cyfarfod ansawdd tua hanner ffordd rhwng yr arolygiadau a drefnwyd er mwyn helpu darparwyr i wneud gwelliannau cyn ein harolygiad nesaf.

Arolygiadau â phwyslais penodol

Mae'n bosibl y byddwn yn cynnal arolygiad â phwyslais penodol mewn ymateb i wybodaeth a ddaw i law am leoliad neu er mwyn cynnal camau dilynol mewn perthynas â meysydd o ddiffyg cydymffurfio a nodwyd mewn arolygiad blaenorol. Dim ond rhai elfennau o'r lleoliad y bydd yr arolygiadau hyn yn eu hystyried.

Mae ein holl arolygiadau bron yn ddirybudd – fodd bynnag, ar gyfer gwarchodwyr plant a chwarae mynediad agored, fel arfer rydym yn ffonio un wythnos cyn inni gynnal arolygiad arfaethedig. Mae hyn i wirio eich argaeledd ac oriau agor. Mae hyn yn golygu rydym yn osgoi colli ymweliadau.

Os ydym wedi ceisio cysylltu â chi ond methu â siarad â rhywun, yna bydd yr arolygiad yn cael ei gynnal heb drafodaeth flaenorol. Fodd bynnag, chi sy'n gyfrifol am ein hysbysu am unrhyw newidiadau i'ch diwrnodau a/neu oriau gweithredu. Byddwn yn arolygu unrhyw wasanaeth ar unrhyw adeg, yn enwedig pan fydd pryderon wedi eu lleisio.

Bob blwyddyn, bydd yn ofynnol i ichi anfon y canlynol atom:

• Datganiad Hunanasesu Gwasanaeth
• Adolygiad o ansawdd gofal y gwasanaeth

Mae rhagor o wybodaeth ar gael ar ein tudalen Datganiad Hunanasesu Gwasanaeth.

O fis Ebrill 2019, bydd pob un o'n hadolygiadau llawn o wasanaethau gofal plant a chwarae yn cynnwys gradd ar gyfer pob un o'r pedair thema a gaiff eu hystyried yn ystod yr arolygiad. Mae hyn yn golygu y caiff gradd Rhagorol; Da; Digonol; neu Wael ei chyhoeddi mewn perthynas â themâu Llesiant; Gofal a Datblygiad; Yr amgylchedd; ac Arweinyddiaeth a Rheolaeth.

Bydd gwasanaethau sydd newydd gofrestru yn cael arolygiad llawn tua chwe mis ar ôl dod yn weithredol. Caiff y graddau a ddyfarnwyd eu cyhoeddi.

Mae ein templed ar gyfer adroddiadau arolygu wedi cael ei adolygu er mwyn dangos y graddau ym mlaen yr adroddiad arolygu ac wrth ymyl pob thema. Ein bwriad yw cyhoeddi graddau ar ein cyfeiriadur ar-lein yn y dyfodol.

Rydym wedi paratoi canllaw arolygu ar gyfer gwarchodwyr plant a darparwyr gofal dydd a chwarae. Rydym hefyd wedi paratoi dull i ddarparwyr chwarae mynediad agored asesu cymarebau staffio.

O fis Ionawr 2019, rydym wedi cynnal arolygiadau ar y cyd o'r gofal ac addysg mewn gwasanaethau wedi'u rheoleiddio nad ydynt yn ysgolion sy'n gymwys i gael cyllid ar gyfer addysg ran-amser.

Yn ystod yr arolygiadau ar y cyd hyn, rydym yn arolygu gofal pob plentyn hyd at 12 oed ac addysg plant tair a phedair oed nad ydynt yn derbyn addysg mewn lleoliadau a gynhelir.

Bydd ein harolygiadau ar y cyd yn darparu:

• Un adroddiad arolygu sy'n cwmpasu safonau mewn gofal plant ac addysg
• Fframwaith arolygu diwygiedig sy'n cwmpasu llai o feysydd ond rhai ehangach
• Amserlenni newydd ar gyfer hyd, amlder a chyfnodau rhybudd arolygiad

Gweler isod ein canllawiau arolygu cyhoeddedig, dogfen gywirdeb ffeithiol, a dogfen ddilynol ar gyfer yr arolygiadau ar y cyd.

Lle rydym wedi cyflwyno hysbysiad o ddiffyg cydymffurfio, byddwn fel arfer yn cynnal ail arolygiad, sy'n canolbwyntio'n benodol ar asesu'r camau a gymerwyd gan y darparwr i fynd i'r afael ag achos o ddiffyg cydymffurfio. Byddwn yn adolygu gradd pob gwasanaeth sy'n cael gradd 'gwael' a hysbysiad o ddiffyg cydymffurfio. Ni fyddwn yn newid y graddau o dan unrhyw amgylchiadau eraill.

Ni fyddwch yn dyfarnu gradd yn ystod arolygiadau â phwyslais penodol yn dilyn pryder, a hynny am fod arolygiadau â phwyslais penodol fel arfer yn canolbwyntio ar feysydd ymarfer penodol iawn.

Pwysig – Darllennwch ein hadroddiadau yn llawn.

Rydym yn gyfrifol am reoleiddio mwy na 4,000 o wasanaethau gofal plant a chwarae. Mae hyn yn golygu y bydd yn cymryd sawl blwyddyn i sicrhau bod graddau pob un o'r gwasanaethau yn cael eu cyhoeddi yn eu hadroddiadau arolygu. P'un a yw'r adroddiad yn cynnwys graddau ai peidio, rydym bob amser yn eich argymell i'w ddarllen yn llawn.
 

Rydym wedi cyflwyno cyfarfodydd ansawdd rhwng arolygiadau er mwyn galluogi darparwyr i roi'r wybodaeth ddiweddaraf i ni am unrhyw welliannau y maent wedi'u gwneud ers yr arolygiad diwethaf. Hoffem hefyd glywed am unrhyw welliannau sydd wedi'u cynllunio ar gyfer y dyfodol, a byddwn yn cyfeirio darparwyr at ffynonellau eraill o gyngor a chymorth a fydd, o bosibl, o help iddynt.

Canllawiau i ddarparwyr

Rydym wedi creu'r fideo canllaw isod a chanllawiau ar gyfarfodydd ansawdd i ddarparwyr er mwyn rhoi rhagor o wybodaeth i chi am yr hyn y gallwch ei ddisgwyl yn eich cyfarfod ansawdd a sut y gallwch baratoi ar ei gyfer.