Gwiriad gwella yn nodi lleihad yn y rhestrau aros ar gyfer gwasanaethau oedolion Cyngor Sir Ynys Môn

Er bod rhai gwelliannau wedi cael eu gwneud yn dilyn ein harolygiad yn 2022, nodwyd gennym fod angen cymryd camau pellach yn y rhan fwyaf o feysydd.

Roedd tîm arwain cryf yn y gwasanaethau oedolion, a oedd wedi llunio ac wedi gweithredu newidiadau cadarnhaol ac a oedd yn ymwybodol o'r meysydd yr oedd angen eu hatgyfnerthu. Roedd aelodau'r tîm wedi gweithio'n galed i nodi cyfeiriad clir ar gyfer newid, ac roeddent yn cael eu cefnogi gan ymarferwyr cymwys ac ymroddedig.

Mae gwelliant o ran sefydlogrwydd y gweithlu wedi arwain at wasanaeth gwell a mwy amserol i bobl. Mae'r gwasanaeth yn hyrwyddo'r opsiwn taliadau uniongyrchol, sy'n enghraifft o ymarfer cadarnhaol. 

Mae'r rhestrau aros ar gyfer asesiadau gwaith cymdeithasol wedi lleihau yn sylweddol, a chânt eu cefnogi gan drefniadau monitro clir. Fodd bynnag, mae'r rhestrau aros ar gyfer therapi galwedigaethol yn uchel o hyd. Rhaid i'r awdurdod lleol sicrhau bod cynlluniau gofal a chymorth yn cael eu hadolygu o fewn 12 mis. 

Mae'r gwasanaeth wedi parhau i elwa ar gymorth corfforaethol a gwleidyddol. Mae'n hanfodol bod hyn yn parhau, er mwyn sicrhau bod y cynnydd a wnaed yn cael ei gynnal, a bod y meysydd y mae angen eu gwella ymhellach yn cael cefnogaeth ddigonol a bod digon o adnoddau ar gael ar eu cyfer. Bydd hyn hefyd yn sicrhau bod yr awdurdod lleol yn cyflawni ei gyfrifoldebau statudol yn gyson.

I weld ein holl ganfyddiadau ac argymhellion, cliciwch ar y ddolen ar waelod y dudalen hon.

Y camau nesaf

Rydym yn disgwyl i'r awdurdod lleol gymryd camau priodol i fynd i'r afael â'r meysydd y nodwyd bod angen eu gwella. Byddwn yn monitro cynnydd drwy ein gweithgarwch adolygu perfformiad parhaus gyda'r awdurdod lleol. 

Rydym yn croesawu ymdrechion gan yr awdurdod lleol i rannu'r ymarfer cadarnhaol a nodwyd gydag awdurdodau lleol eraill, er mwyn hyrwyddo'r gwersi a ddysgwyd a helpu i lywio gwelliant parhaus mewn gwasanaethau statudol ledled Cymru.

Disgwylir i’r awdurdod lleol gyflwyno’r llythyr hwn i aelodau etholedig a’i wneud yn destun proses graffu gyhoeddus drwy gyfarfod pwyllgor ffurfiol ac agored cyn gynted â phosibl. Dylid hefyd estyn gwahoddiad i AGC fynychu'r cyfarfod.